الخميس، 31 أكتوبر، 2013

عالقهوة


شباك وطالل عالشوارع والبيوت
ناسها تشوفها تحبها ف قلبك تفوت
زي التاريخ جاية بتشهد عالحارات
جدرانها شايلة حكاوي من الزمن اللي فات
صوت دندنات السهرانين أمرا وغلابه
وبيت مضلل عالغريب زي السحابة
القهوة عشرة وجيرة ومشاريب عالحساب
أو فضفضة من القلب بين اتنين صحاب
القهوة خلق بتحكي في مية مليون حوار
صوت ضحكها يكسر مرار الانتظار
القهوة مش يأس وطموح فاته الزمن
ولا هو وقت بينقضي من غير تمن
عالقهوة ناس قاعدة تدوق طعم الوطن
-------------------
ودي كانت كلمات النشيد القومي لجمهورية عالقهوة.. ولقب جمهورية ده تم إطلاقه من قِبل زبائن البرنامج الإذاعي الشهير- على الأقل بالنسبة لمستعمي هذه الإذاعة- اللي بيقدمه المذيع المتميز أحمد يونس عبر موجات إذاعة نجوم إف إم المصرية..  
البرنامج ده جمع ناس كتير من مختلف محافظات مصر وربطهم ببعض بحملات وأفكار إيجابية لارتقاء الفرد بنفسه وللمساهمة في إصلاح أوضاع غلط في المجتمع.. حاجة كده أقرب ما تكون للمدينة الفاضلة.. الناس فيها بيحبوا بعض ويخافوا على بعض ويحترموا بعض ويساعدوا بعض ويمدوا إيديهم بالخير لكل الناس..وكلنا فيها اتعلمنا من مذيعنا العزيز/ أحمد يونس يعني إيه إنك تحذف كلمة سلبية من قاموسنا ونعمل كل حاجة نقدر نساعد بيها.. في البرنامج ده أو الجمهورية دي اتعلمنا حاجات كويسة وسمعنا خبرات ناس عظيمة عندها استعداد تساعد بمجهودها وفكرها.. وكمان اتعرفنا فيه على مواهب رائعة بتحسسنا دايماً إن لسه فيه أمل في بكرة.. واحنا أفراد شعب تلك الجمهورية شاركنا بعض الاحتفال بمناسبات كتير خاصة وعامة من غير ما نعرف بعض.. المهم بس نكون كلنا جنب بعض..
أنا بحب البرنامج ده لأنه دايماً قادر على إنه ينور لي في وسط ضلمة اليأس اللي باشوفها ولو حتى ببصيص بسيط يخليني أقدر أواصل وأكمل.. وأنا فخورة جداً جداً  إني من أفراد شعب جمهورية عالقهوة الحبيبة حفظها الله وجعلها سبباً دائماً في بهجتنا وسعادتنا.
   

هناك 6 تعليقات:

  1. وانا وانا وانا
    صحيح مستمعش ليه بقالي فترة بس انا من الجمهورية دي
    وكنت بببعت رسايل دايما
    بس محصلش ولا مرة اني نجحت ف الاتصال بيه
    بس بموت فيه وشاتركت ع الججروب كمان ع الفيس بجد برنامج اكتر من رائع وكفاية اخلاق احمد يونس الي بجد علمنا حاجات كتير
    انا كنت حابة جدا اني اشتغل ف الاذاعة ولغاية دلوقت حابة ده مع ان مجاش ولا فرصة لي
    وعمملت انترفيوهات لقنوات كتير بس معجبنيش حاجة قلت خليني ف شغلي احسن والي ربنا مقدره هو الي هيكون ...بس لسة حلمي اني اكون مذيعة ببرنامج اذاعي زي ع القهوة

    ردحذف
    الردود
    1. رحاب إنتِ من الأحرااااااااااااار يا رحاب :D :D
      فعلاً أحمد يونس أخلاقه راقية جدا والبرنامج ده انا مش عارفة من غيره كنت هاعمله إيه :) .. المهم حاولي تتصلي دايما والأحسن إنك تتابعي الهاشتاج ده على تويتر #3alahwa أنا كتير بكتب تويتات ويقرأها ويقول اسمي وكذا مرة اتقال اسمي في دفتر الحضور وكمان اتصلت في فقرة قولها بصوتك ساعة عيد ميلاد أختي وكانت فقرة تهلك من الضحك :D :D
      تعرفي أنا كمان نفسي أشتغل في الإذاعة أقدم برنامج زي برنامج يونس أو حتى المزيكا أو للأطفال بس مفيش أي فرصة جت قدامي ولا عارفة أدور فين وده من أسباب حزني :/ :( .. ربنا يبعتلنا فرصة حلوة نحقق بيها الحلم ده :)

      حذف
  2. انا بردو من عشاق الراديو والبرامج اللي زي كده ..وكنت بتابع زمان البرامج دي ..وعلي نفس المحطة كنت بسمع برنامج أسامة منير ..ونقول ألو ..ههههههههههههههههههههههههه ..بس لاسف بطلت اسمعها لان نحوم أف أم 100,6 ,ملهاش تردد واضح هنا في اسكندرية ودايما مشوشة ..لذلك اتمني انهم يعملوا تردد خاص باسكندرية عشان انضم معاكم للجمهورية دي :)

    ردحذف
    الردود
    1. هدى إنت كمان من الأحرار بس في بلد تانية :D
      الراديو ده متعة كبييييييييييييييييييرة جدا محدش واخد باله منها ولا حاسس بيها بس برامج زمان على كل الإذاعات كانت جميلة أكتر من دلوقت مش عارفة إيه اللي حصل بقى وخلاها اتغيرت ! .. أما عن نجوم إف إم فكلنا ابتدينا بأسامة منير لحد ما الواحد مرارته ورمت من الاتصالات والمشاكل العجيبة فقرر يهجره إلى غير رجعة :D .. نصيحة لو عاوزة تسمعي عالقهوة وتتابعيه كويس ابقي شغلي موقع المحطة على النت http://www.nogoumfmonline.com/nogoum/ أو لو عندك آي فون أو موبايل بنظام الأندرويد نزلي الأبليكيشن وعيشي بقى .. ونتقابل على تويتر في الهاشتاج اللي قلت عليه لرحاب النهاردة الساعة 12 ونشرب شاي عالهوة سوا :))

      حذف
  3. شوفتها في وقتها يا اسماء الساعه دلوقتي 11:30 ,,وشكــــــــــــــــــــــــــــــرا جزيلا علي اللينك :)

    ردحذف
    الردود
    1. العفو يا هدى ^_^
      يارب تكون حلقة النهاردة عجبتك وتابعيه بقى كل أربع وخميس وجمعة وبلاش يوم الاتنين عشان بتبقى فيه قصة رعب

      حذف