عالقهوة

شباك وطالل عالشوارع والبيوت

ناسها تشوفها تحبها ف قلبك تفوت

زي التاريخ جاية بتشهد عالحارات

جدرانها شايلة حكاوي من الزمن اللي فات

صوت دندنات السهرانين أمرا وغلابه

وبيت مضلل عالغريب زي السحابة

القهوة عشرة وجيرة ومشاريب عالحساب

أو فضفضة من القلب بين اتنين صحاب

القهوة خلق بتحكي في مية مليون حوار

صوت ضحكها يكسر مرار الانتظار

القهوة مش يأس وطموح فاته الزمن

ولا هو وقت بينقضي من غير تمن

عالقهوة ناس قاعدة تدوق طعم الوطن

-------------------

ودي كانت كلمات النشيد القومي لجمهورية عالقهوة.. ولقب جمهورية ده تم إطلاقه من قِبل زبائن البرنامج الإذاعي الشهير- على الأقل بالنسبة لمستعمي هذه الإذاعة- اللي بيقدمه المذيع المتميز أحمد يونس عبر موجات إذاعة نجوم إف إم المصرية..  

البرنامج ده جمع ناس كتير من مختلف محافظات مصر وربطهم ببعض بحملات وأفكار إيجابية لارتقاء الفرد بنفسه وللمساهمة في إصلاح أوضاع غلط في المجتمع.. حاجة كده أقرب ما تكون للمدينة الفاضلة.. الناس فيها بيحبوا بعض ويخافوا على بعض ويحترموا بعض ويساعدوا بعض ويمدوا إيديهم بالخير لكل الناس..وكلنا فيها اتعلمنا من مذيعنا العزيز/ أحمد يونس يعني إيه إنك تحذف كلمة سلبية من قاموسنا ونعمل كل حاجة نقدر نساعد بيها.. في البرنامج ده أو الجمهورية دي اتعلمنا حاجات كويسة وسمعنا خبرات ناس عظيمة عندها استعداد تساعد بمجهودها وفكرها.. وكمان اتعرفنا فيه على مواهب رائعة بتحسسنا دايماً إن لسه فيه أمل في بكرة.. واحنا أفراد شعب تلك الجمهورية شاركنا بعض الاحتفال بمناسبات كتير خاصة وعامة من غير ما نعرف بعض.. المهم بس نكون كلنا جنب بعض..

أنا بحب البرنامج ده لأنه دايماً قادر على إنه ينور لي في وسط ضلمة اليأس اللي باشوفها ولو حتى ببصيص بسيط يخليني أقدر أواصل وأكمل.. وأنا فخورة جداً جداً  إني من أفراد شعب جمهورية عالقهوة الحبيبة حفظها الله وجعلها سبباً دائماً في بهجتنا وسعادتنا.