الأحد، 28 يوليو، 2013

حلم أبيض

***********************************************************************
- حلم أول : 
"شباكنا ستايره حرير.. 
من نسمة شوق بيطير.."
 كانت بتحلم تسكن في بيت عالبحر بعيد عن كل حاجة وعن كل الناس .. وهوا البحر يخلي ستاير البيت ترفرف وقلبها يرفرف معاه .. ومع كل دقة الشوق يعلا ويزيد .. 
- حلم تاني : 
"وبقالي كتير يا حبيبي..
 باستنى تجيب الفرحة.. 
والتوب الابيض والطرحة..
 ونطير نطير نطير زي العصافير.."
كانت بتحلم بيه .. فارس على حصان أبيض زي اللي حكوا لها عنه في القصص الخيالية.. يجيلها ومعاه الفرحة اللي بتحلم بيها .. كانت دايما بتشوف نفسها واقفة جنبه بالفستان الأبيض والطرحة.. وساعتها كانت بتحس إنها طايرة في السما من كتر الفرحة.. حتى لو كانت فرحة في الخيال وبس !!
- حلم تالت : 
 "نصبح على فرحة وردة..
ونبات على نور ياسمينة.."
كانت بتحلم ببيت حواليه خضرة كتير .. بيت تعيش فيه معاه صبح وليل في سعادة شبه اللي قالولها عنها في حكايات سندريلا والأميرة النائمة .. بيت بعيد عن الصورة الواقعية اللي الكل كان بيحاول يخنق أحلامها بيها..  صورة كلها خناقات وهم المصاريف ومتاعب الولاد .. بيت يفضل الحب فيه معشش وما يطيرش مع أول هبة ريح !! 
- حلم رابع : 
"افرد جناحين الشوق..
وتعالى نطير على فوق..
نسكن مع نجمة بعيد.. 
مشغولة بحب جديد..
ولا حد هناك يسمعنا..
مهما نقول ولا نعيد.."
كانت بتحلم إنه يتحدى كل حاجة ويجي ويخطفها على جناح الشوق.. ويعيشوا هناك فوق في السما الواسعة.. وما يجاورهمش غير القمر والنجوم الطيبة.. ويعيشوا بعيد عن ضوضاء الأرض وصخبها.. ولا يقدر ساعتها حد يلومهم على لحظة صدق باحوا فيها بكل اللي جوا قلوبهم !!
***********************************************************************
** الصورة من صور زفاف الأميرة كيت والأمير وليام ولي عهد بريطانيا  

هناك تعليق واحد: