الأربعاء، 4 سبتمبر، 2013

سيرة الأراجوز



التيمة الأساسية لحياة بني آدم مصري :
"حزن يا بقال ورا الجامع
هات بنص ريال عسل فى الكوز
ده اللى كان عيل بقى شاعر
واللى كان ضاحك بقى أراجوز" 

***********************
مشهد أول :(الصداقة /بداية ونهاية)
"جيبتلي صاحب وحبيته
زقنى فى المترو زقيته
وأما مات فيا ومت انا فيه
روحتله بيته وعزيته "
************************
مشهد تاني :(اكتشاف الوجه القبيح للحياة)
"حبنى الشارع وحبيته
عض قلبى الليل وعضيته
خضنى الأنسان وخضيته
لما بان من وشه عفاريته"
 ***********************
تصاعد الأحداث :(رحلة العمر)
"عدى فيا القمح سمرنى
عدى فيا الفجر صبرنى
عدى فيا الحزن غيرنى
عدى فيا العمر كبرنى"
************************
مشهد تالت : (ذكريات فلاش باك)
"عدى فيا العمر كبرنى
خدنى م اللفة لمريلتى
خدنى م التسنين لحصالتى
خدنى من مدرستى ع الجامعه
خدنى م الترعة على الاسفلت

خدت م الاتوبيس مراياته
خدت م السواق حكاياته
خدت م الركاب تذاكر موت"

***********************
مشهد رابع :(الحب الأول /ضياع وخلود)
"ياللى وحشانى متوحشنيش
ضحكك السكر محلانيش
خوفت م المطرة قفلت الشيش
ليه فضل اسمك على الشباك"
*************************
مشهد خامس :(حب تاني / محاولة فاشلة للتعايش)
"كنت جايب دبلة وغويشه
كنت شارب حاجه مغشوشه
شفت شبهك قاعده فى الكوشه
قلت هى لا مش هى
فتشتنى الدمعه عن الميه
كنت أنشف من حطب محروق"
**************************
مشهد سادس : (مناجاة)
"حزن يا محول خطوط سيرى
حزن يا عطار فى باب اللوق
شوفلى تحويجه لتفسيرى
حط ريحه بُن لضميرى
شوفلى عود أصلب من المغشوش"
************************
مشهد سابع : (اليأس)
"ردنى عالباب عطب روحى
جابلى ناى وزتونة مطروحى"
***********************
 ذروة الأحداث : (تسليط الضوء على الحقيقة المرة)
" مُر انا يا صاحبى لو دوقتنى
جيت اقول الآه ما صدقتنى
يطرح إيه الملح غير مالح
يطلع إيه م الجرح غير مجروح

ليه ما تصفاشى لغير صافى
ليه فى عز الحوجه بتجافى
شوفتنى غاطس ولا طافى
كنت بندهلك حلاوة روح"

 ***********************
مشهد تامن : (النهاية)
"حزن يا بقال ورا الجامع
هات بنص ريال عسل فى الكوز
خد سنين الجرى وسنينى
هاتلى سن غزال دهب عينى
قطع الاسفلت شرايينى
هات بياض القطن شاش اللوز"

***********************
ملحوظة : جربوا تسمعوا الأغنية دي بتصور المشاهد دي وكأنها حياتكم إنتم هتندهشوا من الحقيقة اللي هتوصلولها ألا وهي ... حياة كل واحد فينا هي سيرة أراجوز مطلوب منه إنه يضحك طول الوقت .. بس إنك تفهم هو مين ؟ بيحس بإيه ؟ كان بيحلم بإيه ؟ ليه دايماً حاسس بالحزن ؟ شيء صعب إنه يشرحه ومش هيلاقي حد يفهمه !!!!



ليست هناك تعليقات:

إرسال تعليق