ضحكة ودمعة

ضحكة صافية

" من الاخر كده في ناس ضحكة صافية من جوه قلوبهم تخدك وياهم لدنيا تانية عالم خيال حب وضحك فرح وسعادة اماني واحلام صفا ونقاء تعيش اللحظة ومش مستنى اي مقابل ولا هما بيطلبوا تمن لضحكة قلبك بسمة عينك وياهم يوم ما تلاقي واحد منهم افديه بعنيك "

انجي مطاوع *

 

------------------------

دمعة صافية  

 

" زي ما فيه ناس بتضحك ضحكة صافية فيه ناس دمعتها صافية نابعة من حزن صافي.. حاجة كده كلها شجن بيمس القلب.. الناس دي ما بتبقاش حزينة نتيجة لعدم رضا عن وضعها أو قلة الفلوس.. ولكن بتبقى موجوعة على كل شيء بيروح.. حزينة عالحب اللي بيتشوه معناه وقيمته.. إحساسهم العالي بالناس وآلامهم وعدم قدرتهم على إحداث تغيير سريع أو إسعاد حد بيحبوه بيخلي الحزن يملا قلوبهم لأقصى مدى.. كمان التشوه اللي صاب كل شيء جميل وقعت عليه عينيهم في يوم بيجرحهم أوي.. وكل الحاجات دي ممكن تخليهم في يوم يدمعوا.. يومها لو جت عينيك في عيونهم وشفتهم وهما بيدمعوا ما تلومش عليهم.. بس احضنهم وطبطب عليهم.. هما مش طالبين الشفقة ومش هاممهم إن حد يهتم بدموعهم أو وجعهم وحزنهم ده.. بس عارف إنت لو أخدت حد فيهم في حضنك وطبطبت عليه حتى لو كانت الطبطبة دي بكلمة فيها أمل في إن اللي راح ممكن يرجع وإن الجمال موجود طول ما عينيهم بتشوفه وخيالهم قادر يخلق حاجة زيه هيرتاحوا حبة وهيقدروا يكملوا في الدنيا.. أصل هما مش قصدهم ياخدوك لدنيا كئيبة حزينة هما بس عاوزين حد يشحن بطاريتهم تاني ويقولهم دموعكم دي غالية وإن الأمل موجود.. الناس دي فعلاً كنز لأنهم عالأقل قادرين يقدروا قيمة كل القيم المعنوية والروحية اللي بتضمحل يوم ورا التاني.. لو تعرف حد فيهم امسك فيه وزقه لقدام على قد ما تقدر.. عشان لما الدايرة تلف ويجي الدور عليك تلاقيهم جنبك.. وجايز كمان تتعدي منهم مش في الكآبة ولا الدموع.. وإنما في حب الخير وإن عينيك تشوف دايماً كل جمال في أي حاجة تقابلها! "

بقلمي أنا / أسماء خليفة

---------------------------------

* انجي مطاوع : مدونة شابة وإحدى المشاركات في حدث التدوين اليومي المعروف باسم #حوليات تدوينية

مدونة "خيال وحكي ليل ونهار" / إنجي مطاوع