عن الناس المقهورة
" أكتر ناس مقهورة ومحروقة على البلد هما الناس اللى بيفكروا ومشغلين دماغهم وبيدققوا فى كل خبر بيقروه وغير منساقين فى أى من القطيعين .. الناس اللى مترفعين عن الانتماء لأى فريق او فصيل او تيار لإن كله بيدور على مصلحته .. الناس اللى معليين مصلحة البلد على اى مصلحة شخصية ومجنبين كراهيتهم لأى شخص او تيار عشان ما يأثرش على رؤيتهم للحق .. الناس اللى شايفين الحق متوزع على الطرفين .. حتة هنا وحتة هنا .. وشايفين الباطل متوزع على الطرفين حبة هنا وحبة هنا .. وشايفين حبة اوساخ هنا وحبة اوساخ هنا .. ولما بيقولوا كلمة حق بياخدها اوساخ كل فريق يستغلوها لصالحهم وبيزايدوا عليها .. دول اكتر فريق محروق ومقهور ومش عارف يعمل ايه ! "
أحمد الصباغ*
-----------------------
عن الناس الرايقة :
" أكتر ناس رايقة هي اللي البلد بالنسبة لها مجرد جنسية في جواز السفر وشوية أخبار (ياي) بتضايقهم وتصدعهم.. هما اللي مش فاهمين هو الناس دي بتتخاق ليه وبيضربوا نار كده ليه.. هما اللي الحظر خنقهم عشان ما كانوش عارفين يخرجوا يروحوا يقابلوا صحباتهم وأصحابهم ويظبطوا بقى.. واللي برضه ما عرفوش يروحوا الساحل ولا بورتو مارينا عشان يتفسحوا ويصيفوا بقى.. اللي اتضايقوا جدا لما قناة الحياة قاطعت المسلسلات التركي بقى وحرمتهم من الفرجة على الممثلات التركيات ( الأمامير).. اللي شايفين إنه أي حد بيموت يبقى يستاهل.. واللي شايفين إنه البلد دي ما ينفعش تتحكم غير بالحديد والنار.. اللي لو سألتهم يعني إيه دستور مش هيعرفوا يردوا عليك.. اللي لو قلتلهم طب إيه الفرق بين السلفيين والإخوان برضه مش هيعرفوا يردوا عليك برضه، بس احتمال يقولولك إن الاتنين عايزينا نتنقب أو نتحجب ونربي دقننا ونبطل نسمع أغاني ونشوف مسلسلات.. وآه هيختموا بكلمة الفئتين دول لازم يرجعوا السجون تاني بداعي إنه ( خلي البلد تنضف من الإرهابيين دول ).. اللي لحد دلوقت مش فاهمين هو ليه قامت ثورة وليه فيه ناس ماتت ما الحياة كانت زي الفل والله ! .. أما اللي قاموا بثورة دول ناس ما كانتش بتحمد ربنا عالنعمة !!"
بقلمي أنا (هرطقة ليس لها أي هدف أو معنى غير فش الخلق)
----------------------------
* أحمد الصباغ : مدون شاب يهتم بالأدب الساخر والتصوير الفوتوغرافي. صاحب كتابي "الضرب في الميت" و "كتاب مسيل للدموع"
ليست هناك تعليقات:
إرسال تعليق