محاولات للفهم

-ليه الناس الصبح وهي ماشية في الشارع رايحة أشغالها مش بتبقى مبتسمة؟!
-عشان عارفين إنهم رايحين لروتين بيكرهوه بس مش عارفين يغيروه!!
-ليه فيه ناس بقت بتمشي تكلم نفسها ؟!
-عشان بيخافوا يكلموا بعض .. عشان ما بقوش فاهمين بعض!!
-ليه فيه ناس على العالم الافتراضي أجمل من العالم الواقعي؟!
-عشان بيكونوا متحررين من كل القيود اللي مش عارفين يكسروها في العالم الواقعي..
-ليه أغلب البنات بتحب الأفلام الرومانسية ؟!
-عشان الرومانسية اللي بيشوفوها في الأفلام مش موجودة في الواقع!
-ليه عم عامر الفراش اللي باشوفه في الشغل دايماً مبتسم وبيحب الأغاني اللي بتتكلم عن السُمْر؟!
-عشان متأكد إن مفيش حاجة تستاهل إنه يزعل عليها.. عشان الأغاني اللي بتتكلم عن السُمْر حلوة فعلاً !!
-ليه الكوتش أحسن من الجزمة اللي بكعب؟!
-عشان بيخلينا حاسين إننا قادرين نجري.. أو نطير !!
-ليه كتير من البنات بتحب الجزمة اللي بكعب عالي ؟! 
-عشان دي صورة الـ "ليدي" اللي اترسمت في ذهنهم من وهما صُغيرين.. ويقال إنها بتعبر عن اكتمال أنوثتهم!!
-ليه الناس بتخاف من المجانين؟!
-عشان بيخافوا يواجهوهم بحقيقتهم وإنهم هما أصلاً اللي مجانين !!