الأحد، 8 يونيو، 2014

قواعد الانبساط الأربعون

من غير رغي كتير أحب أقدم أقدم لكم قواعد الانبساط الأربعون :
1- قابل أصحابك اللي بقالك كتير أوي ما شفتهمش
2- قابل حد من أصحابك برضه اللي ما شفتهمش بس من غير ما تكونوا متفقين أو مرتبين للقاء.. الصدف والمفاجآت في الحالات دي حلوة أوي.
3- اضحك كتير حتى لو من غير سبب.. في الأول هتستغرب نفسك وهيقولوا عليك عبيط بس مش مهم.. لأنه في النهاية هتلاقي الضحك قلب بجد وبقيت مبسوط فعلاً.
4- قول كل اللي جواك لحد بتحبه
5- جرب أكلة أو مشروب جديد
6- غني مع أصحابك بصوت عالي قدام الناس
7- زور مكان جديد
8- شارك ناس ما تعرفهمش أي احتفال خاص بيهم واتعامل على إن المناسبة دي بتاعتك انت 
9- البس لبس جديد أو طقم انت بتحبه 
10- احضن صاحبك اللي بتحبه.. وبالنسبة للبنات الكلام هيبقى مقصود بيه الصديقات يعني :D 
11- اتصور مع أصحابك كتير صور مش تقليدية.
12- ارقص على أغنية انت بتحبها حتى لو كنت في مكان عام وحتى لو كنت هترقص وانت قاعد في مكانك
13- اسمع مزيكا بتحبها
14- اقرأ كتاب بتحبه
15- صور فيديو لنفسك وانت بتتصرف بطريقة كوميدية
16- اعمل هاشتاج غريب عن حاجة غريبة ما يكونش حد فاهم فيه حاجة غير أصحابك القريبين
17- ابعت كلام حلو لحد انت ما تعرفهوش .. هيتبسط أوي وبالتالي انت هتتبسط أوي 
18- اكتب جواب لنفسك وابعته
19- اكتب جواب برضه بس لناس تانية تعرفها أو ما تعرفهاش 
20- ما تفكرش 
21- اعمل أي حاجة مجنونة تخطر على بالك من غير ما تفكر في كلام الناس
22- اتصور سيلفي واتريأ على نفسك في كومنت
23- ما تركزش في أي حاجة حواليك عشان عينك ما تشوفش الوحش فيها 
24- بص للأطفال الصغيرين كتير وافتكر بس برائتهم وانسى كل لحظات الغلاسة بتاعتهم
25-اتصور فيديو تاني وانت بتعمل حاجة كوميدية بس مع أصحابك
26- صور منظر طبيعي عجبك
27- اخرج كتير مع أصحابك المجانين.. لأن عندهم قدرة فظيعة تخليك تنسى أي حاجة مضايقاك
28- انصح حد نصيحة مفيدة
29- ما تتكلمش مع حد في السياسة خالص الأيام دي.. ولا أقولكم ما تتكلموش مع حد فيها لا دلوقت ولا بعدين لأنه مفيش فايدة
من 30 ل 40 - غني وارقص واتصور وصقف وهيص واخرج مع أصحابك المجانين.. انسى سنك وانسى مشاكلك معاهم ولو لثواني.. صدقوني كده بس هنتبسط ! 

هناك تعليقان (2):

  1. جميلة أوي ياأسماء..أن الإنسان يحتفظ بطفولته ومرحه ده شيء جميل :)

    ردحذف
    الردود
    1. فعلاً يا نيللي إن الواحد يحتفظ بطفولته ومرحه ده أجمل شيء على الإطلاق .. بس أنا ما باعرفش أحتفظ بالكلام ده غير مع أصحابي وبس .. المرح والطفولة عمالين يضيعوا وبحارب بالعافية عشان أخلي شوية منهم .. ادعيلي بقى :)

      حذف