مع السلامة 2013

عزيزتي 2013 ..

بعد التحية والسلام..

باكتبلك وفاضل على نهايتك دقائق معدودة.. ومخي فاضي ومليان جداً في نفس الوقت مش عارفة إزاي تيجي دي !!!..

على الرغم من إن ناس كتير عمالة تشتم فيكِ وتقول إنك كنتِ سنة وحشة.. وعلى الرغم من إني ما حققتش فيكِ حاجة من اللي كنت باحلم بيها ولا فرحت زي ما اتمنيت.. لكن وأنا بافكر في الأيام اللي عدت منك لقيت إنك برضه كنتِ حلوة.. اتعرفت فيكِ على ناس جميلة.. حصلتلي حاجات فرحتني، صحيح إنها كانت قليلة بس لازم أعترف إن من غيرها كان الوضع هيبقى أسوء بكتير..

وما أقدرش أنسى كمان إنه صدماتي في بعض الناس اللي حصلتلي خلالك، غربلتلي علاقاتي.. وما بقاش حواليا غير فعلاً اللي يستاهلوا واللي بيحبوني فعلاً وبيحسوا بغيابي ووجودي بيفرق معاهم..

عزيزتي 2013 ..

أنا عاوزة أشكرك من قلبي على الحاجات الحلوة القليلة اللي حصلت معايا فيكِ.. مش هاقدر أنسى أبداً مكالمة المذيع أحمد يونس في برنامج عالقهوة ولحظات الضحك يومها وأنا باتخيل إن مصر كلها سامعاني وإنه بفضل حبة التهييس اللي كنت فيهم قدرت أضحك ناس كتير يومها.. مش هاقدر أنسى كمان التدوينات اللي كتبتها في بداياتك وأكدت لي إني لسه فيا الرمق وينفع أكتب.. وأكيد أكيد باشكرك شكر خاص على ايفنت التدوين اليومي والصحبة الحلوة اللي عرفتها من خلاله.. والأهم إنه حررني إلى حد ما .. يعني على الأقل دلوقت بقيت قادرة أكتب عن أي حاجة ممكن تيجي على دماغي.. وكمان مش هاينفع أنسى لحظة فرحتي فيكِ بأول مرة تتنشر لي حاجة من اللي كتبتها حتى ولو كان ده في جريدة الكترونية مش ورقية زي ما كنت باحلم..

عزيزتي 2013...

وكل اللي فات ده حاجة والناس اللي عرفتها فيكِ حاجة تانية.. الناس اللي بتحبني وبتدعيلي واستحملتني كتير وانا عارفة إنها لسه هتستحملني كمان بس عشان هما بيحبوني ومصدقين فيا ولسه شايفين النور اللي جوايا.. الناس اللي اتعلمت منها ولسه هاتعلم كمان وكمان.. الناس اللي بحبها عشان هي لسه جواهم الإنسانية والمشاعر الطيبة رغم كل القرف اللي احنا عايشينه.. واسمحيلي انا هاشكرهم بالاسم وأكتب لهم عاللي باتمناه لهم في أيامهم الجاية..

نور.. 

اللي فعلاً أكدتِ لي إنها هي وبس رفيق الروح مش أي حد تاني.. يارب تلاقي طريقك وتقدري تغيري في الدنيا فعلاً وتفضلي مجنونة وتخليني محتفظة بجناني أنا كمان.

سحر..

اللي برغم البعد - اللي أنا بقيت فيه - لسه بتحبني وعاوزاني أبقى أحسن.. يارب ترجعي زي زمان بس إنتِ افضلي حاولي وما تيأسيش.. أنا متأكدة إنك هتبقي حد مهم ومؤثر أوي في حياة الناس.

عمرو.. 

"أخا الروح" اللي خلاني أحب السما أكتر.. صدقني وجودك في حياتي فرق معايا كتير وهيفضل يفرق حتى لو كان مجرد "وجود عابر".. أنا عارفة إنت بطلت تكتب شعر ليه أو حاسة بالسبب.. يارب ترجع تكتب أحسن من زمان وتبقى أحسن دكتور أسنان شاطر.

ابراهيم..

أخي وصديقي اللي كان أكتر حد مصدق فيا الفترة اللي فاتت.. اللي لسه شايف إني  حد جواه طاقات هائلة ومشروع "إنسانة عظيمة".. صاحب أحلى فكرتين عملناهم سوا.. يارب تحقق كل اللي بتحلم بيه يا ابراهيم.. وأنا متأكدة إنك هاتبقى مهندس مهم في مجالك.. وهتسيب بصمة قوية في حياة الناس زي فتحي الله يرحمه.. ويارب كمان تسافر وتدرس برة بس ما تطولش كتير هناك وترجع تفيدنا هنا.

محمد رفعت..

أخويا الصغير الحنين جداً.. رفيق لحظات التهييس.. الشخص اللي لما باشوفه في الصور باتبسط جداً جداً وبادعي دايماً إنه ما يطلعش برة دايرة حياتي إلى الأبد.. يارب تحقق حلمك وتبقى "ستيف جوبز" العرب ويرزقك بالبنت اللي تستاهلك.. وكده يبقى لك عندي زغروطتين.. واحدة في حفلة التخرج وواحدة في فرحك المستقبلي إن شاء الله..

توني..

أخويا الصغير المرح جداً.. اللي بيحب يضحكني وبيقدر يعمل كده دايماً.. الإنسان الطيب اللي عمره ما شال من حد.. يارب يا توني أشوفك أحسن استاند أب كوميديان في مصر.. ونعمل سوا البرنامج الإذاعي اللي بنحلم بيه.

شادي مجدي..

أخويا المتفائل.. اللي لسه شايف إني "صانعة أمل" جامدة جداً.. اللي مش بيحب يشوفني زعلانة أبداً.. واللي ممتنة لوجوده في حياتي.. يارب ياشادي تتخرج بقى وتبدأ رحلة النجومية.. أنا متأكدة إنك هاتبقى ممثل عظيم في أقل من 5 سنين.

شادي حازم..

توأمي الموسيقي.. الوحيد اللي بيلقبني بلقب أميرة دائماً وأبداً.. أول حد أغرط في حفلة تخرجه وأبقى مبسوطة جداً باللحظة دي وكأن ابني بيتخرج مش أخويا وصديقي.. شريكي في لحظات الوجع والداعم ليا دائماً.. يارب يا شادي تخلص فترة الجيش على خير وتشتغل في أحسن شركة وتبتكر بقى عشان أنا متأكدة إنك جواك حاجات عظيمة.. ويارب أفرح بيك قريب أوي.

أحمد رأفت..

أخويا اللي باعتبر معرفته كنز فعلاً.. صاحب فضل بعد ربنا عليا.. رفيق "عالقهوة" الأكثر أدباً وذوقاً.. اللي نفسي أبقى زيه في حماسه كده.. يارب تنجح يا أحمد وتتخرج بقى وأشوف أهم وأحسن مرشد سياحي في مصر.. وربنا يحققلك أمنيتك الغالية في القريب العاجل.

انجي مطاوع..

ما كانش ينفع ما أكتبش عنك رغم طلبك.. أكتر حد بيتابعني في كتاباتي وبيشجعني دايماً.. واللي لو اتنشر لي حاجة في كتاب الفترة الجاية هتبقى هي صاحبة الفضل في ده بعد ربنا.. الإنسانة المثابرة اللي بادعي ربنا يوفقها وتحتل المكانة اللي تستاهلها في دنيا الكتابة.

خولة..

رفيقة التدوين وأختي الصغيرة.. اللي جمعني بيها اشتراكنا في رقة الإحساس والوجع والحزن النبيل.. ربنا يخليكِ ليا يا خولة.. ويارب تنجحي في الكتابة والدراسة وروحك تلاقي الحب اللي تستاهله.

عزيزتي 2013 .. باشكرك على لحظات الوجع والحزن اللي أنا مش عارفة قيمتهم دلوقت بس حاسة إني هاعرفها بعدين وهتفرق إيجابياً في حياتي.. باشكرك على لحظات الفرح والضحك المسروقة من بين أنياب الزمن.. باشكرك على كل حاجة.. وبارجوكٍ توصي 2014 عليا شوية.. 

 صحبتك السلامة يا 2013..

الإمضاء / أسماء