الاثنين، 16 ديسمبر، 2013

وِشْ

" ينفع كده ؟!! .. ده إنتِ طلعتِ خايبة ! "
كانت دي الجملة اللي وجهها ليا صديق لوالدي لما زارنا من ست سنين تقريباً، كتعقيب على فنجان القهوة اللي عملتهوله من غير "وِشْ"..
وقتها ما كنتش باعرف أعمل القهوة أصلاً، وفاكرة إني اتضايقت جداً من تعليقه ده..
كل اللي كنت حاساه ساعتها إني فاشلة، وإني بكده بافتقد لشيء مهم مش بس بيكمل مهارات البنت الشاطرة في المطبخ، لأ كمان بيعبر عن مدى تميزها عن باقي البنات.. 
قررت بعدها إني أتعلم إزاي أعمل القهوة بـ "وِشْ" ونجحت في ده في وقت قصير جداً..
ورغم إن الموضوع من بره يبدو بسيط وسهل لكن حقيقي أنا اكتشفت إن عمل القهوة بالوِشْ شيء مش هين أبداً !..
لأن السهولة بتيجي من اقتصار الأمر على فنجان واحد.. لكن التحدي الأصعب إنك تصب القهوة في كذا فنجان ويكون على سطح كل واحد فيهم وِشْ..
بس مع الوقت برضه نجحت في تحويل التحدي ده لأمر ممتع بالنسبة لي ووسيلة لإبراز مدى تفردي بقدرتي على عمل فنجان قهوة مُعتبر وبـوِشْ كمان !
لكن فضل دايماً بيلح على دماغي سؤال..
ليه بيعتبر الوِشْ أمر ذو أهمية بالنسبة للقهوة ؟!..
واكتشفت الإجابة لما ابتديت أشرب القهوة برة البيت..
كل مرة كان فنجان القهوة يجيلي من غير وِشْ كنت بحس بإن فيه حاجة ناقصاني..
كأن الوِشْ هو بوابة دخول عالم سحري مصنوع من طعم وريحة القهوة..
ده غير إن الوِشْ ساعات بيعبر عن شخصية صاحبه..
زي إنه يكون مليان دواير فيعبر عن شخص بيفكر كتير..
أو سادة فبيعبر عن شخص خالي البال..
أو مرسوم على شكل وردة أو حتى وش مبتسم وبيعبر عن حالة اللي بيشرب القهوة في لحظتها !!
ويبقى في النهاية إن فنجان القهوة بالنسبة لي لا يكتمل إلا بوجود الوِشْ على سطحه..
وِشْ أغرق فيه وأنسى عالم الواقع بتاعي !!



  

هناك 4 تعليقات:

  1. هههههههه إذا كنا عايزين النسكافيه بـ وش
    يبقى عايزة القهوة ما تبقش بـ وش ؟
    دي تبقى هزلت
    عموما أنا جاية أشرب فنجان قهوة من ايدك ياريت ما تنسيش الوش :)

    ردحذف
    الردود
    1. معلش أخرت عليكي في الرد يافاطمة بس كنت متكتكة من البرد مش أكتر :-D
      المم أنا مستنياكيؤبقى والقهوة عالنار اوعي تتأخري أحسن هاصبها وتبرد بعد كده :-D

      حذف
  2. فلسفتي القهوة يا اسماء بس عموما اعتقد انها تبع شرقيتنا العريقة بدليل ان تركيا بيغلوها عادي بتحسي بمتعه نفسية فعلا مع الوش :)

    ربنا يحلي ايامك كلها يارب اسموءة

    ردحذف
    الردود
    1. أنا حاسة يا انجي إني ماشية الأيام دي في سكة الفلسفة ودي سكة أخرتها خطر :-D
      ما علينا .. أنا ما دورتش في تاريخ الوش بتاع القهوة الحقيقة بس على ما أذكر القهوة العربية اللي بيشربوها من زمان أيام البدو وكده كانت برضه من غير وش ! .. جايز ده بسبب شرقيتنا زي ما قلت بس ده هيدفعني إني أبحث وكه وأول ما أوصل لنتيجة هاقولك :-D

      حذف