‏إظهار الرسائل ذات التسميات التغيير. إظهار كافة الرسائل
‏إظهار الرسائل ذات التسميات التغيير. إظهار كافة الرسائل

الجمعة، 6 ديسمبر 2013

نُضج

عندما تجلس إلى نفسك وتتذكر كل تلك الأغاني والكتب التي كنت تقرأها تشعر بالدهشة حقاً من نفسك..  فمن مرحلة الاستماع إلى أغاني التسعينات المليئة بالإيقاعات والكلمات البسيطة إلى الإقبال على أغاني أم كلثوم واللجوء إلى صوت محمد منير في لحظات الشجن والفرح التي تمر بك.. ومن مرحلة قراءة روايات عبير وسلسلة زهور وروايات مصرية للجيب وشعر نزار قباني باعتباره ملك الرومانسية والذي تغنى بشعره الكثير من المطربين، إلى الشغف بشعر محمود درويش والتفكر فيما يقصده بكلماته.. وليس هذا وحسب بل تجد نفسك تطرق أبواب شعراء مثل فدوى طوقان ونازك الملائكة والسياب وصلاح عبد الصبور لتقرأ عبر كلماتهم إجابة لأسئلة تدور في ذهنك.. وأن يصبح اللسان المعبر عن حالك شعر مصطفى ابراهيم وأغاني بلاك تيما وكايروكي ومسار إجباري وبساطة.. تكتشف أنك قد تغيرت كثيراً ولكنه تغير أقرب للنضج حيث اكتشاف مناطق جديدة داخل نفسك والنظر للحياة بشكل أكثر واقعية.. ولكنك تعرف أن هذا ليس نهاية المطاف فمازالت رحلة النضج والتغير مستمرة.. فقط عليك مواصلة الطريق..

الخميس، 5 ديسمبر 2013

كلاسيك.. ليه لأ ؟!!!

بقى من المعتاد في افتتاح أي محل جديد في أي مدينة مصرية "أصيلة"، إنه يكون فيه حبال نور متعلقة ودي جي بيشغل أغاني مختلفة قال إيه احتفالاً بالافتتاح !!.. والمشكلة عمرها ما كانت في حبال النور وإنما في الدي جي اللي أصبح أكبر وأسوء مصدر تلوث سمعي في مصر.. حيث إنه بقى من المعتاد إن الصوت يبقى عالي جداً لدرجة لا تحتمل.. ده غير نوعية الأغاني اللي بيتم تشغيلها وأعني هنا أغاني المهرجانات.. بقت الأغاني دي هي اللي سائدة وتتخللها فقرات من الأغاني "العادية"، لكن في كل الأحوال الإزعاج والضوضاء من الاتنين بقوا لا يُحتملوا.. والعذاب الحقيقي إن شخص تكون ظروفه أجبرته على البقاء في البيت يبقى مضطر للاستماع للضوضاء دي لمدة 3 أو 4 ساعات متواصلة.. ده العذاب في الجحيم ممكن يكون أرحم من كده يا ناس !!..
واكتشفت مع الوقت إن الوضع بيبقى أسوء.. لكن مع ذلك يبقى بصيص أمل.. أنا فاكرة في مرة محل تم افتتاحه من 5 شهور تقريباً وعمل أكبر مفاجأة ممكن أي حد يتخيلها!!.. الدي جي اللي جابه كان بيشغل مقطوعات موسيقى كلاسيك !!.. مقطوعات لعمر خيرت وموسيقى هادية خلتني ما كنتش عاوزة الافتتاح يخلص.. وسألت نفسي يومها ليه كل المحلات اللي بتعمل الافتتاح بتاعها ما تشغلش النوعية دي من الموسيقى؟!!.. وما حدش يقوللي أصل الناس بقى ذوقها كده !!.. لأني واحدة من الناس وما بحبش أغاني المهرجانات عالأقل في افتتاح المحلات وفيه زيي كتير كمان.. بس الموضوع محتاج مننا زقة.. ولو قالولنا أصحاب المحلات بقى احنا على آخر الزمن نشغل في الافتتاح أغاني وموسيقى كلاسيك ؟!.. حنرد عليهم ونقول لهم : وليه لأ ؟!!!!  
 

الأربعاء، 4 ديسمبر 2013

زي النهاردة*

"خاطرة طرأت على ذهني ..
أوقات ممكن ربنا يحط ناس ف طريقك وتحبهم انت أوي ويبقى نفسك تعمل لهم أي حاجة هما عاوزينها بينما هما مش بيكونوا على نفس المستوى من العطاء معاك .. ممكن ده يخليك تحزن وتقول لنفسك هما ليه مش بيحبوني زي ما باحبهم ؟ ويعني هو أنا اللي هافضل أدي علطول وليه هما ما يبادلونيش العطاء حتى لو بالكلمة الطيبة والسؤال ؟! ..
بس لو حسبتها من ناحية تانية هتلاقي إن ربنا يمكن يكون حطك في طريق النا
س دي عشان تاخد انت بإيدهم وتعلمهم معنى العطاء أو حتى إنك تشجعهم وتحفزهم وتطلع أحسن ما فيهم على قد ما ربنا يديك من عزم وصدق وإخلاص في الكلمة اللي هتقولها لهم .. ويمكن يكون حطهم في طريقك وجعل نصيبك من محبتهم وعطائهم لك مش بنفس القدر اللي انت بتتعامل بيه عشان يختبر مدى ثباتك وصبرك على ابتلاء مالوش اسم محدد لكن ممكن وصفه بقلة العطاء أو بخل المشاعر .. والأهم اختبار ربنا لقدرتك على مشاركة الآخرين بما عندك من نصح أو مشاعر إيجابية وياترى هل هتفيض عليهم من الكرم اللي ربنا أنعم عليك بيه ولا هتتحول وتبقى بخيل زيهم ؟!"

كُتبت في 4/12/2012 
 -----------------------------------------
النهاردة بالمصادفة فتحت لينك على موقع الفيس بوك، شيره حد من أصحابي بيعرض شكل التايم لاين زي النهاردة من سنة كان إيه والناس وقتها كانت كاتبة إيه.. ولما قلبت في المكتوب لقتني كنت كاتبة الخاطرة دي بنفس تاريخ النهاردة بس الفارق الزمني بين لحظة الكتابة ولحظة القراءة كان سنة.. سنة مريت فيها بحاجات كتير وكنت فاكرة إني اتغيرت تماماً بسبب كل الحاجات دي - الحلو منها قبل الوحش - بس اكتشفت إني كنت موهومة.. رغم مرور سنة أنا لسه مؤمنة بنفس الكلام اللي كتبته وبانفذه حتى من غير ما آخد بالي..رغم إني كنت مقررة إني لازم أتغير بسبب الوجع الكبير اللي حسيت بيه، علشان اديت كتير وما لقتش مقابل بنفس القدر والشكل للي اديته.. لكن برغم كده ما اتغيرتش والسخيف في الموضوع إني ما حستش بده!!.. بس مش عارفة بقى إذا ثباتي على نفس الفكرة دي رغم مرور السنة شيء إيجابي ولا سلبي.. وياترى بعد سنة من النهاردة هاكون لسه محتفظة بنفس الفكرة وباطبقها ولا لأ ؟!!!!
----------------------------------------------------------------
* العنوان مقتبس من فيلم للمخرج عمرو سلامة بنفس الاسم.  
 

الثلاثاء، 3 ديسمبر 2013

احنا وهما !!

رغم إنهم في يوم من الأيام كانوا بيقولوا زينا على نفسهم "احنا"..
بس النهاردة بقوا "هما" !!.. 
رغم إنهم عارفين إن الكبت بيولد الانفجار لكنهم كل يوم بيمارسوا عملية الكبت دي باسم الحب والخوف.. وكتير بيحاربوا أي تغيير بنحاول نعمله في حياتنا.. بس الحقيقة إنهم خايفين من التغيير.. خايفين نقدر نعمل اللي هما ما قدروش يعملوه.. خايفين نرفض اختياراتهم اللي هما زمان اختاروها غصب عنهم.. خايفين من أي طريق جديد ممكن نروح فيه وندخل دنيا جديدة بيه.. شايفين إن أسهل حاجة التعود والاستقرار.. وبيمارسوا من أول لحظة بنتولد فيها عملية برمجة بشعة بتؤدي في نهاية إلى تدمير السوفت وير بتاعنا !!
أهالينا الأعزاء..
مسيرنا في يوم من الأيام هنقدر نطير ونتحرر ونغير دنيتنا زي ما احنا عايزين..
أبناء وبنات جيلي الأعزاء..
التغيير قادم قادم بس احنا لازم نقوي نفسنا.. نبقى شجعان وما نخافش.. ده الضربة اللي ما بتموتش بتقوي..
  

الاثنين، 2 ديسمبر 2013

في دايرة الرحلة*

"في دايرة الرحلة طرق بنا تخلى"
حين تبدأ رحلتك في الحياة تتصور أن كل من بدأوها معك سيبقون حتى النهاية، أو حتى تتمنى أن يظلوا موجودين أطول فترة ممكنة.. لكن هذا لا يحدث في الغالب، فالرحيل مظهر من مظاهر التغيير التي دائماً ما تحدث مهما حاربناها.. وسبحان من يغير ولا يتغير..

"عيون مرة تباعد.. خطاوي مرة تعاند"
"حنين جوانا يحكي وشوق جوانا يبكي"
خلال رحلتك في الحياة ستجد أن بعض العيون التي عشقتها أو حتى تلك التي كانت تبثك الأمن والطمأنينة في يومٍ من الأيام ستبتعد عنك بسبب أو حتى بدون سبب.. لكنه القدر هو الذي حتم ذلك وثق بأن لذلك حكمة خافية قد تعرفها يوماً ما أو لا.. المهم ألا تتوقف كثيراً عند تلك العيون فقد تفوتك عيون أخرى تحمل لك كل الخير والحب..
وفي رحلتك قد تبدأ بخطط معينة وتسير في الطريق لتنفيذ تلك الخطط لكنك ستجد أنها قد تتوقف بلا سبب.. فتحاول لتحريك المسيرة مرة أخرى لكن بلا جدوى.. إنها تعاندك لتخبرك بوجوب تغيير خططك واتجاه مسيرتك.. فإذا وصلت لتلك المرحلة لا تحزن وحاول أن تغير خط سيرك بأقل الخسائر الممكنة.. وثق بأنك لم تخسر شيئاً فعلى الأقل حاولت وأخذت بالأسباب..
في دائرة الرحلة ستجد أن الحنين والشوق سيحاولان تمزيقك إرباً من الداخل.. ستجد عينيك تفضحانك دوماً بالدمع مهما حاولت التماسك أو السكوت.. في تلك اللحظة لا تبتئس مما يحدث.. فقط تأكد بأنك مازلت إنساناً يشعر.. وأن قلبك مازال ينبض في زمن ماتت فيه الضمائر والقلوب.. وفكر بأن هناك رسالة ما من وراء ذلك الحنين والشوق.. وفقط حاول أن تكتشفها ولا تتركهما يعذبانك بلا جدوى!!

"ليه يا سنين العمر.. ترضي لنا بالمر"
"ده لولا فينا صبر.. لهان علينا العمر"
"في دايرة الرحلة.. أيامنا عالمولى" 
"ليلنا أيا ليلنا .. مرة هتحلى لنا"
"تميل على ميلنا .. في دايرة الرحلة"
أثناء رحلتك ستجد نفسك تلوم الأيام كثيراً على القسوة التي تقابلها.. على ألم الفقدان.. على تكرار التجارب البائسة في حياتك، رغم أنك حاولت قدر المستطاع التعلم مما سبق.. على ضياع الأحلام والخطط.. على المرارة التي تغلف مأكلك ومشربك وملبسك.. لا أقول لك أنه يجب عليك أن تتوقف عن لومها.. لكن اعتصم بحبل الصبر الذي يكاد ينفتل، بل وحاول تقويته باستمرار.. وتأكد أن المرارة لا تدوم.. واربط كل عمل لك بالله.. وضعه نصب عينيك دائماً.. وتذكر أن كل شيء مقسوم بقدر.. الحزن والوجع قبل الفرح والراحة.. فلا تبتئس طويلاً.

"رحلة أيا رحلة ..  يا صعبة يا سهلة"
"رحالة خطوتنا.. في دايرة الرحلة"
تذكر دوماً أن حياتك كلها رحلة.. رحلة بدأت بالخروج من عنق الموت للرجوع إليه في النهاية.. رحلة ستجد فيها بعضاً من الأحلام التي تحققت بسهولة.. بعضاً من الأفراح التي طرقت حياتك بلا استئذان.. بعضاً من المشاعر الدافئة التي جاءتك عن طريق المصادفة.. وأنك استمتعت بكل هذا الذي جاءك بلا تعب أو نصب.. لكنها أيضاً رحلة ستقابل فيها المخاطر.. رحلة سترى فيها أن ملامسة السماء أيسر من تحقق بعضاً من أحلامك وخططك.. رحلة ستشعر فيها بالألم يسد طريقك ويحاول أن يطرحك أرضاً فيكون بهذا قد هزمك.. لكنها في النهاية رحلة لا يجب أن تتوقف خطوتك عند أي مرحلة فيها سواء أحببت ذلك أم لا.. فالتوقف يعني موتك ونهاية الرحلة !!
-------------------------------------------------------------------------
* العنوان يعود لأغنية بنفس الاسم للفنان أحمد منيب في هذا الرابط : في دايرة الرحلة 
 
 

 

جاكت الترينج الكحلي

يووووه بقى من الجو اللي مش باين له ملامح ده !..
ما هو يا يبقى برد بجد عشان الواحد يعرف يتقل في الهدوم، يا إما يرجع معتدل كده أو حتى صيفي عشان ألبس لبس عادي.. لكن اللي بيحصل ده أوفر أوفر فعلاً !!..
حاجات كتير في حياتي متلخبطة ومش واضحة المعالم زي الجو ده..
كل يوم باصحى على أمل إني هاعرف أظبطها أو أغيرها للأحسن ..
لكن مع نهاية اليوم بكتشف إني ما عملتش التغيير المطلوب.. 
أو عالأقل التغيير اللي يحسسني بالرضا لحظة ما احط راسي عالمخدة وأنام !
 ******
امبارح وقفت كتير قدام الدولاب عشان ألبس حاجة تنفع مع الجو الغريب ده..
وأخيراً قدرت أتوصل لتيشرت نص كم على بادي لا هو تقيل ولا هو خفيف..
واكتمل الطقم المنزلي ببنطلون رياضي..
بس أكتر حاجة ريحتني كانت ألوانهم..
تراوحت الألوان بين الأسود والأبيض والرمادي الفاتح..
وكأني بحاول أحسم حاجات جوايا متلخبطة باستخدام ألوان محددة..
ألوان أعرف أشوف بيها نفسي كويس..
أو ألوان نفسي الدنيا تكون مصبوغة بيها..
يمكن ساعتها أقدر أفهمها !!
بس الغريب إني عشان أقاوم لسعة البرد اخترت قطعة لونها بعيد عنهم..
كانت القطعة الرابعة هي جاكت ترينج لونه كحلي !!
ويعود تاريخ جاكت الترينج ده لأيام ثانوي..كنت بحبه أوي وكل ما ألبسه بفتكر أيام حلوة..
منها لما وقعت في ملعب المدرسة لما كنا بنتدرب لأول مرة على لعبة كرة اليد..
غريبة الذكرى دي إنها تندرج تحت بند أيام حلوة مش كده ؟!!
المهم لما لبسته بصيت لنفسي جواه لقيته بقى واسع أوي..
من تلات سنين كنت بابقى مالية مركزي جواه..
لكن دلوقت الوضع اتغير..
لأ الواقع بيقول إن أنا اللي اتغيرت..
خسيت وما بقتش تخينة زي زمان..
مع إني كنت فاكرة إني عمري ما هاتغير وهافضل شبه الدبدوب..
ومع إني ساعات بحن لهيئتي زمان جوا جاكت الترينج الكحلي..
ومع إني بحن للدفا اللي كان بيصاحبني وأنا لبساه..
لكني سعيدة برضه بهيئتي دلوقت..
وبرغم كل اللبس التقيل اللي ممكن ألبسه في الشتا..
دايماً بالاقي إيدي بتسحب الجاكت ده عشان ألبسه في نفس الوقت كل بداية شتا..
وتفسيري لده إنها مجرد محاولة لاسترجاع دفا وجمال الماضي..
ويبقى في النهاية حاجة واحدة بس..
كل ما بابص على كم الجاكت ودراعي بيلق جواه من كتر وسعه..
باسأل نفسي..
هو ما كانش ينفع التغيير يحصل..
بس الدنيا جوايا تفضل واسعة كده زي جاكت الترينج الكحلي؟!!
   

السبت، 30 نوفمبر 2013

هوامش على دفتر التغيير

* التغيير يتطلب قوة إرادة وثقة بالنفس.
* تغيير العادات والمعتقدات - خاصة لو كانت سلبية -  قد يأخذ وقتاً طويلاً ويحتاج مجهوداً جباراً (أو زي ما بحب أقولها بالعامية محتاج نفس طويل)
* تغيُر الإنسان سواء بشكل إيجابي أو بشكل سلبي أفضل كثيراً من ثباته على حالة أو سلوك أو فكر معين لا يتغير مهما تغير الوقت.
* يبدأ فعل التغيير عندما يستقر في وعي الإنسان أنه بحاجة فعلاً للتغيير.
* أحياناً يكون تغيُر المرء للأسوء تعبيراً عن اعتراضه على وضع ما أو احتياجه للمساعدة.
* بعض مظاهر التغيير يقاومها المجتمع أو يرفضها إذا شعر أنها تهدد فكرة معينة أو وضع معين استقر عليه لفترة طويلة، وهو ما يعرف بالخوف من التغيير.
* لا يمكن إنكار أن الثورات العربية والتظاهرات قد ساهمت في تغيير سلوكيات أفراد المجتمع وجزء من تفكيرهم، لكن للأسف الشديد أشعر بأن التغيير كان للأسوء.
* الإحباط يلعب دوراً في تعطيل الرغبة في التغيير أو إيقاف عملية التغيير نفسها.
وأخيراً :
" فيه حاجات كتير عايزاك..... 
تفضل كده مسافر.....
ف طريق ملوش اخر ….
إكمنها حتموت....
ف الرحله من غيرك....
فيه حاجات كتير عايشاك....
خايفاك تبطلها ….
وحاجات كتير عايزاك....
لكن معطلها...
إن إنتَ مش عايز....
جايز...
حاجات منها....
حتعيش وتستناك ….
جايز حاجات تانيه...
ف الزحمه راح تنساك.... 
زي اللي راحوا زمان...."
مصطفى إبراهيم